تقریب میں برطانیہ کے پرنٹ، الیکٹرانک اور ڈیجیٹل میڈیا سے وابستہ صحافیوں نے شرکت کی تقریب کا اہتمام چوہدری خالد محمود اور محمد عابد نےراچڈیل کے مقامی ھال میں کیا۔ لاہور () بیرسٹر امجد ملک کے وائس چیئرپرسن اوورسیز پاکستانیز کمیشن پنجاب بننے پر برطانیہ میں ایک پر وقار تقریب کا اہتمام کیا گیا۔ تقریب میں برطانیہ کے پرنٹ، الیکٹرانک اور ڈیجیٹل میڈیا سے وابستہ صحافیوں نے کثیر تعداد میں شرکت کی ۔ تقریب کا اہتمام پاکستان مسلم لیگ ن ہیڈ آف ٹریڈ ونگ برطانیہ چوہدری خالد محمود اور محمد عابد نےراچڈیل کے مقامی ھال میں کیا۔ تمام صحافی برادری نے بیرسٹر امجد ملک کو وائس چیئرپرسن اوورسیز پاکستانیز کمیشن بننے پر مبارکباد پیش کی۔ ان کا کہنا تھا کہ بیرسٹر امجد ملک ایک متحرک اور محنتی قانون دان ہیں۔ انکی بطور وائس چیئرپرسن تقرری بیرون ملک مقیم پاکستانیوں کیلئے ایک نعمت سے کم نہیں۔ اس موقع پر بیرسٹر امجد ملک نے اس عزم کا اظہار کیا کہ وہ تارکین وطن کے مسائل کے حل اور انکی فلاح و بہبود کیلئے کوئی کسرنہیں چھوڑیں گے۔ پنجاب اوور سیز پاکستانیز کمیشن کے دروازے سب کے لئے بلا تفریق کھلے ہیں۔ اوورسیز پاکستانیوں کے مسائل کو حل کرنا مسلم لیگ ن کی ہمیشہ ترجیح رہی ہے۔ اس موقع پرقونصل جنرل آف پاکستان مانچسٹر طارق وزیر ،ممبر پارلیمنٹ ستارہ امتیاز پاکستان محمد افضل خان ،برطانیہ کے معروف کاروباری و میڈیا گروپ کے ہیڈ سالیسٹر ڈاکٹر لیاقت ملک ،اوورسیز پاکستانیز ویلفئیر کونسل کے چیئرمین محمد نعیم نقشبندی ،راچڈیل کے میئر کونسلر شکیل احمد، راچڈیل کونسل کے ڈپٹی لیڈر کونسلر عدالت علی، برطانیہ بھر سے بیرسٹرز،سالیسٹرز،کونسلرز، میئرز،ڈاکٹرز، کاروباری شخصیات و کمیونٹی لیڈرز اور مسلم لیگ ن برطانیہ و اسپین کے سنیئر عہدیداران نے بھر پور شرکت کی۔ تقریب کے اختتام پر وائس چیئرمین اوورسیز پاکستانیز کمیشن پنجاب بیرسٹر امجد ملک نے میڈیا پرسنز و کمیونٹی رہنماؤں کو انکی کارکردگی پر شیلڈز پیش کئے۔
